Kom jy saam?

yolandi-profileWelkom by die Webtuiste van Vellies na die Vreemde. Sedert 2007 begelei ek avontuurlustige Suid-Afrikaners op hul reise en pelgrimstogte na die plekke van die Bybel. Natuurlik is Israel ons hoof bestemming, maar ander Bybellande soos Egipte, Turkye, Italië, Griekeland en deesdae ook Spanje waar ons die Camino de Santiago pelgroemsroete aflê, het met die tyd gevolg.

‘n Pelgrimstog of reis na die Bybellande is afspraaktyd. Gekoopte tyd. Soos alle ander reise gaan jy verseker ook vakansie hou, nuwe ervarings meemaak, plekke sien, ontspan en jou sintuie voed, maar Bybellandreise hou ander verwagtinge in. Jesus was gedurende sy leeftyd op aarde slegs ‘n paar keer in Jerusalem – elke keer as pelgrim om een van die Joodse feeste by te woon. Psalm 84 – die Pelgrimslied – gaan juis oor die voorspoed en geluk wat pelgrimsgangers te wagte kan wees. So het die eerste gelowiges ook gereeld na Jerusalem op ‘n pelgrimstog gegaan. Na afloop van Paulus se derde sendingreis was hy so angstig om na Jerusalem en die Tempel te gaan dat niks hom kon stuit nie – nie eens ‘n profesie oor sy lot daar nie (Hand 21:10-14).

Ons moderne Christen kultuur is soms arm aan pelgrim wees. Maar iets gebeur tog met mense wat hierdie eeu-oue beginsel opneem. Daar kom ontmoetings en gewaarwordings. Kreatiwiteit neem toe en mense kom vertel lewensveranderde stories. Ek glo pelgrim wees is deel van mens wees. Pelgrimstyd is afspraaktyd. ‘n Tyd vir nuut word en nuut dink. Kom beleef hierdie avontuur saam met ons!